BUTUAN CITY – Wala’y angayang kabalak-an ang mga Pinoy nga duna’y kabanay didto sa Taiwan kansa nabutang karon sa init nga hisgutanan human ang tulo ka adlaw nga combat-readiness patrols and military drills sa Taiwan Strait.
Sa eksklusibong pakighinabi sa Bombo Radyo Butuan, gipadayag ni Bombo international correspondent Chen Ni Kao direkta gikan sa Taiwan nga normal na alang kanila ang maong military operation tungod kay matag-karon ug unya matud pa kining ginahimo sa China.
Hinuon aminado kining ang pagsupak sa Taiwanese government sa kagustuhan sa mainland China, duna gayoy consequence sama sa nahitabong pagbisita ning mi-aging tuig ni kanhi US House Speaker Nancy Pelosi sa ilang nasud nga miresulta sa pagpatuman sa China og economic embargo nga miresulta usab sa kadaghan sa na-lay off sa ilang trabaho.
Propaganda lang matud pa ang pasi-atab nga duna’y tensyon sa Taiwan Strait tungod sa pagpanginlabot sa Estados Unidos sa problema sa mainland China ug sa Taiwan.
Kini dala matud pa sa negosyo sa US nga mao ang pag-supply og mga armas rason nga basta duna’y gubot nga nasud, atua ang Estados Unidos.
