BUTUAN CITY – Magduso og motion to dismiss si Atty. Francisco Pobe, regional director sa Commission on Elections kon COMELEC-Caraga sa kasong gipasaka batuk kaniya tungod sa nakuhang mga dili rehistradong tambal matud pa sa COVID-19 diha sa iyang sakyanan niadtong weekend.
Kini human siya nakapyansa rason sa iyang na-angkon karong temporaryong kagawasan.
Sa eksklusibong pakighinabi sa Bombo Radyo Butuan, giklaro ni Atty. Pobe kinsa taga-Dapa, Surigao del Norte, nga entrapment operation sa mga sakop sa Criminal Investigation and Detection Group kon CIDG ang nahitabo kansa alang kaniya, bunga sa pagpakita lang niya og kaayo ngadto sa iyang higala.
Wala magdahom ang opisyal nga ka-transact na diay sa iyang higalang midalikyat sa ilang regional office, ang taga-CIDG.
Aminado siyang siya ang mi-offer nga dalhon ang maong mga kinarton nga tambal ngadto sa Surigao del Norte isip friendly gesture tungod kay ma-atol man usab matud pang duna siya’y tambungang tigom sa ilang provincial office.
Nakurat na lang siya dihang nagpa-ila na kaniya ang taga-CIDG ug nagpasabot nga entrapment operation ang ilang gihimo rason nga gidala siya sa ilang buhatan alang sa prosesong ilang ginasunod sama sa pagkuha kaniya og mug shot.
Ang iya lang gipalagan mao ang pagkaylap gilayon sa iyang klaro kaayong mug shot diha sa social media inay nga tabunan pa unta ang iyang mata o kaha i-blur ang iyang nawong kansa karon gisubay pa kung kinsa ang nagpasi-ugda.
