BUTUAN CITY – Planong ibalik sa Brgy. Masao ning siyudad ang ilang quarantine control point sa junction sa Brgy. Lumbocan aron makontrol ang pagsulod sa mga tawong gustong maligo sa ilang beach resorts.
Kini ang gipadayag ni Kapitan Romeo ‘Ondo’ Suello human ang insidente sa pagkalumos kagahapong adlawa sa ulitawong si Aldrin Paden, 29-anyos ug residente sa Purok 6, Zacor, Brgy. Tandang Sora.
Sa eksklusibong pakighinabi sa Bombo Radyo Butuan, gipadayag ni Kapitan Suello nga sabutan pa nila sa iyang barangay council ang dugang lakang nga himuon aron dili na ma-usab pa ang maong insidente ilabina nga sa maong panghitabo, nalapas ang social distancing tungod sa panagtapok sa mga tawong gustong mutan-aw niini.
Inisyal na usab niyang nasabot ang Butuan City Police Station 3 alang sa pagpabalik sa control point aron masiguro ang hugot nga pagpatuman sa social distancing dili lang diha sa mga mulabay nga sakyanan kondili apil na sa mga mag-ukupa sa ilang beach cottages.
Apil sa ilang sabutan ang pagbutang og mga life guards aron duna gilayo’y muresponde higayong duna’y matigayon pa ang ingon niining insidente.
Samtang gibutyag sa amahan sa biktimang si Lucino Paden nga duna’y sakit nga patol ang iyang anak nga atakihon panagsa kondiin mauli-an ra kini kung anaa ra man kini sa mala.
Kagahapon hayan naglisod matud pa pagpangayo og tabang ang biktima dihang gi-atake samtang naligo sa dagat ilabina nga daghan ang mga tawong nangaligo rason nga lisod gyod kining mabantayan.
