BUTUAN CITY – Gimanduan ni U.S. President Donald Trump, ang United States Navy nga pabuthan ang mga makitang Iranian boats nga nagbutang og mines sa Strait of Hormuz.
Sa usa ka post sa social media, gibutyag ni Trump nga gimanduan niini ang Navy nga dili magduha-duha sa pagpusil og pagpatay sa bisan unsang barko nga magbutang og mines sa kadagatan.
Sumala pa ni Trump, ang Estados Unidos padayon nga nagtrabaho aron kuhaon ang mga mina sa strait ug gibida ang mga “mine sweepers” sa Amerika nga mihimo og operasyon sa kasamtangan apan gimandu niyang isaka ang lebel sa maong mga operasyon sa tulo ka higayon.
Isip tubag sa padayon nga tensyon sa rehiyon, nga may kalabutan sa mga isyu sa global economic pressures, gibutyag ni Trump ug ni Defense Secretary Pete Hegseth nga nabungkag na ang mga nag-unang pwersa sa Iran, nga gibana-banang dunay 150 ka barko.
Bisan paman niini, gitaho nga ang Islamic Revolutionary Guard Corps (IRGC) dunay nahabiling mga assets sama sa gagmay nga bangka nga padayon nga gigamit sa mga operasyon.
