BUTUAN CITY – Mi-abot sa 12 ka mga tawo ang patay samtang 309 ang angol sa pag-atake sa King Khalid International Airport sa Riyadh, Saudi Arabia.
Sumala sa Saudi General Authority of Civil Aviation o GACA, lakip sa mga namatay ang upat ka Saudi nationals, duha ka taga-Bangladeshi, ug tag-usa gikan sa Estados Unidos, Egypt, Jordan, Syria, Palestine ug Sudan. Pipila sa mga naangol ang nakasinati og grabeng kadaot sa lawas ug padayon nga gitambalan sa nagkalainlaing ospital.
Gikataho usab nga adunay mga kabtangan ug pasilidad nga nadaot tungod sa pag-atake, samtang padayon pa nga gisusi sa mga otoridad ang kinatibuk-ang gidak-on sa kadaot.
Gilambigit ang maong pag-atake sa sunod-sunod nga opensiba sa grupong Houthi, nga gisuportahan sa Iran, batok sa Saudi Arabia taliwa nga una nila kining gipanghimakak.
Lakip sa mga gikatahong target sa nangaging mga pag-atake ang mga tugpahanan ug uban pang importanteng pasilidad sa Saudi Arabia.
Tungod sa insidente, temporaryong gisuspinde ang operasyon sa tugpahanan ug gibalhin ngadto sa ubang destinasyon ang mga biyahe sa eroplano nga paingon unta sa Riyadh, samtang padayon pang gisusi ang gilapdon sa kadaot ug ang kahimtang sa mga na-angol.
