BUTUAN CITY- Mahibaloan na sa sunod nga hearing sa House Committee on Justice ang sulod sa income tax returns nila Vice President Sara Duterte ug bana niining si Atty. Manases Carpio, human gikomperma sa komite nga nasumite na kini sa Bureau of Internal Revenue.
Sumala ni Justice Committee Chairperson Rep. Gerville Luistro, nawad-an na og puslos ang petisyong gipasaka ni Carpio sa Quezon City Regional Trial Court niadtong Abril 13, kansa nagtumong matud pa nga pugngan ang komite nga makuha ug isapubliko ang ilang ITR.
Kahinumdumang gireklamo ni Carpio ang gipagawas nga subpoena sa komite batok kang BIR Commissioner Charlie Mendoza kansa nagmando niini nga magsumite og mga dokumento sa buwis nga adunay kalabotan sa magti-ayon ug sa ilang mga negosyo. Giinsistar usab nila nga paglapas kini sa Data Privacy Act ug exceedingly overstretched, hilabi na nga nagsugod palang ang termino ni Duterte niadtong Hunyo 30, 2022.
Pormal na nga ipresenta ang ITR sa hearing sa komite sa Abril 22. Gilaoman usab ni Luistro nga hisgutan kauban sa BIR ang mga limitasyon pag-abot sa confidentiality sa nasangpit nga mga dokumento. Samtang, giklaro sa magbabalaod nga subling ang reports lang gikan sa Anti-Money Laundering Council (AMLC) ang ipatawag sa komite alang sa gikatakdang hearing sa Miyerkules kalabot sa alegasyon sa unexplained wealth batok sa Bise Presidente.
Sakop sa gipangayong dokumento ang covered transactions o ang mga kantidad nga mo-abot sa P500,000 pataas, igon man ang suspicious transactions nga obligadong itaho sa mga bangko sa AMLC pila man ang kantidad niini.
