BUTUAN CITY – Plano sa Gilas Pilipinas nga magpahigayon og training camp sa Seremban, Malaysia isip pagpangandam sa sunod nga window sa FIBA World Cup Asian Qualifiers.
Sumala ni Samahang Basketbol ng Pilipinas (SBP) Executive Director Erika Dy, kabahin gyud sa plano ni Gilas Pilipinas head coach Tim Cone ang pagpahigayon og training sa usa ka nasod sa Southeast Asia.
Posible usab nga sayo nga muadto ang Gilas sa Malaysia aron makapahigayon og dugang nga training apan kung dili kini madayon, dinhi na lamang sa Pilipinas himuon ang ilang pagpangandam.
Gikatakdang ipahigayon ang sunod nga FIBA window sa Nobyembre 27 ug 29, diin target sa Gilas nga mapa-ayo pa ang ilang 4-4 nga daog-pildi nga rekord.
Una nilang atubangon ang Syria sa Nobyembre 27, samtang sa Nobyembre 29 ilang maka-atbang pag-usab ang Iran.
