BUTUAN CITY – Gi-angkon asawa sa magulang nga lalaki ni Pope Leo XIV nga ang iyang bana, gitambalan usab sa sakit nga kanser, human gipahibalo sa Vatican nga adunay kanser ang Santo Papa.
Sigon ni Deborah Prevost, asawa ni Louis Prevost, kamagulangang igsoon sa Santo Papa nga ang iyang bana aduna’y usa ka matang sa kanser sa dugo ug wala pa maklaro kung unsa na kini ka-advance.
Ang iyang pamahayag migawas sa samang adlaw dihang ang 71-anyos nga si Pope Leo, ang unang Amerikanong natawo nga nahimong pangulo sa Simbahang Katolika, malampusong na-operahan alang sa kanser sa baga ug gila-uman nga magpabilin siya sa ospital sulod sa usa ka semana.
Sigon ni Deborah, daghan ang ilang gi-agian isip pamilya ug ilang paningkamotan nga magpabiling positibo ug lig-on alang nilang duha.
Sumala ni Deborah, si Louis nagpatambal alang sa multiple myeloma, usa ka matang sa kanser sa dugo, isip kabahin sa usa ka clinical trial sa ospital sa Florida diin kini nagpa-ayo.
Una siyang na-diagnose nga adunay kanser niadtong 2017 ug nagpatambal niadtong 2019, apan tulo ka bulan na ang milabay sukad nga nibalik ang iyang sakit human kini makontrol kaniadto.
Sumala sa National Health Service o NHS sa United Kingdom, ang multiple myeloma maka-apekto sa dugo ug bone marrow ug mahimong maka-apekto usab sa mga kidney.
Sumala sa Multiple Myeloma Research Foundation, dakong pag-uswag ang nahimo sa survival rate sa mga pasyente sulod sa mi-aging dekada alang sa mga duna sa maong sakit.
Gikumpirma usab ni Louis Prevost sa laing interbyu ang iyang diagnosis ug nagbutyag nga mipa-ilalom siya sa CAR-T cell therapy.
Ang maong pamaagi naglakip sa pag-usab o pag-reprogram sa immune cells sa pasyente aron mailhan ug mapatay niini ang mga cancer cells sa dugo.
Sigon ni Louis, nakurat siya pagkahibalo nga ang iyang igsoon aduna usa’y kanser.
