BUTUAN CITY – Gipatuman na ang dismissal order batok nila Urdaneta City, Pangasinan Mayor Julio Parayno III, Vice Mayor Jimmy Parayno ug unom ka konsehal, subay sa gipagawas nga consolidated decision sa Office of the Ombudsman.
Sumala ni kanhi konsehal Michael Brian Perez, ang nagreklamo sa maong kaso ug kanhi presidente sa Liga ng mga Barangay sa siyudad, nakurat siya sa dihang nadawat ug nabasa ang desisyon, apan nalipay siya.
Matud niya, dugay na niyang gipaningkamotan nga makab-ot ang resolusyon sa maong kaso ug wala na gani siya magdahom nga mapadayon pa ang proseso tungod kay nagsugod pa kini niadtong 2022.
Gidugang ni Perez, gihimo niya ang maong lakang alang sa mga residente ug mga residente sa Urdaneta City nga nagtinguha nga masulbad ang mga isyu nga gipasaka batok sa mga opisyal sa siyudad.
Human sa pagpatuman sa maong mando, nanumpa na ug mipuli sa ilang bag-ong katungdanan sila Blesildo Sumera isip alkalde ug Rio Virgilio Esteves isip bise alkalde sa Urdaneta City.
Base sa 21-ka palid nga consolidated decision sa Ombudsman, napamatud-ang administratibong manubag sila Mayor Parayno III ug Vice Mayor Parayno sa kasong grave misconduct o grabeng sayop nga pamatasan sa pag-alagad sa gobyerno.
Samtang ang unom ka konsehal nga sila Franco Paolo San Juan Del Prado, Warren Dela Cruz Andrada, Aurelio Agsalud, Franklin Villanueva, Jhan Hero Sumera ug Alfonso Miguel Manuel Del Prado, gihukman usab og administratibong tulubagon tungod sa gross neglect of duty o grabeng pagpasagad sa ilang katungdanan.
Gawas sa pagtangtang sa serbisyo sa gobyerno, gipahamtangan usab ang mga opisyal og permanenteng diskwalipikasyon sa paghawid sa bisan unsang posisyon sa gobyerno, pagkansela sa ilang civil service eligibility, pagdili sa pagkuha sa Civil Service Examination ug pagkawala sa katungod sa pagdawat sa retirement benefits.
