BUTUAN CITY – Gipa-abot sa usa ka concerned citizen dinhi sa Bombo Broadcast Center ang iyang kabalaka kalabot sa tukuron nga usa ka poultry farm sa Sitio Santa Cruz, Brgy Manila de Bugabos ning siyudad sa Butuan nga nakita niyang makadaut sa kina-iyahan.
Sa eksklusibong pakighinabi sa Bombo Radyo Butuan, gipadayag ni Nicolas Tabayag Jr., mihimo na og public consultation ning mi-aging buwan ang proponent sa maong negosyo uban sa pag-abag sa mga barangay officials kansa iyang gibabagan.
Kini matud pa ang rason nga wala pa maka-abante aron unta mukuha og mga rekisitos sa mga hingtungdang buhatan o ahensya sa Butuan City Hall aron maproseso na ang ilang business permit.
Aminado si Tabayag nga makatabang sa panudlanan sa barangay ang maong negosyo apan kinahanglan matud pang lantawon usab ang kadaut nga mahatud niini diha sa kina-iyahan ug sa panglawas sa mga residente nga sa ngadto-ngadto, makahatag gayod og dili maayong epekto tungod sa mga hugaw nga klarong ipagawas niini diha sa ilang mga water tributaries sama sa nagtunhay nila nga mga sapa ug busay.
