BUTUAN CITY – Nakatala na og mga pagbaha sa pipila ka lugar sa sentrong bahin ning siyudad sa Butuan ug kasikbit nga mga lalawigan tungod sa padayong pag-ulang nasinatian sa tibuok Caraga Region sukad pa kagahapon tungod sa tropical depression Vicky.
Gi-alerto na sa Philippine Atmospheric, Geophysical and Astronomical Services Administration kon PAGASA ang mga nagpuyo sa mga low-lying ug mga flood o kaha landslide-prone areas ilabina nga mulungtad pa hangtud ugmang adlawa Sabado ang kusog nga pagbundak sa ulan nga may maka-trigger sa flashfloods ug landslides.
Sa pagkakaron, gibawalan na sa Philippine Coast Guard (PCG) Surigao del Norte ang paglawig sa mga gagmay’ng sakyanang pandagat nga duna’y gibug-atong 20-tonelada pa-ubos.
Sigon ni Capt. Inocencio Rosario Jr., commander sa Philippine Coast Guard-Surigao del Norte, kini pagsunod na usab sa abiso sa PAGASA ilabina sa gipagawas nilang gale warning.
