BUTUAN CITY – Gihangyo karon ni Pangulong Rodrigo Duterte ngadto sa tanang mga Filipino nga wagtangon na ang diskreminasyon ngadto sa mga Chinese nationals kansa mugna sa Wuhan coronavirus.
Sa eksklusibong pakighinabi sa Bombo Radyo Butuan, gipadayag ni Presidential Communications Operations Office kon PCOO Sec Martin Andanar nga kini ang hangyo sa pangulo atol sa ilang gihimong emergency meeting kagabii sa palasyo sa Malakanyang.
Kini human nga una nang nagpatuman og travel ban ang gobyerno ngadto sa tanang mga langyaw nga gikan sa China apil na sa mga administrative regions niini sa Hong Kong ug Macau aron malikayan ang pagkaylap sa nasangpit nga virus.
Ubos sa maong kamanduan, ang mga Pinoy ug kadtong mga langyaw nga mga permanent residents dinhi sa nasud, tugutang makasulod ubos sa kondisyong mupa-ilalom sila sa 14-diyas nga quarantine.
Gibutyag sa kalihim nga nadugang sa kamanduan sa pangulo nga mamahimong makasulod sa nasud ang mga duna’y kaliwat nga Intsik basta dili lang sila gikan sa China, Macau ug Hong Kong.
Dugang pa sa kalihim, sa ingon niini nga panahon gikinahanglan ang pagtinabangay isip community of nations rason nga angayan lang tabangan ang China ug dili kay i-segregate o kaha i-discriminate sa rasong nila gigusto ang maong outbreak.
