BUTUAN CITY – Gimando sa usa ka huwes sa Estados Unidos nga tangtangon ang pangalan ni President Donald Trump gikan sa titulo sa Kennedy Center for the Performing Arts ug gipugngan usab niini ang temporaryong pagsira niini alang sa giplanong renovation.
Sigon sa korte, dili mahimong usbon ang ngalan sa maong venue nga naa sa Washington DC kung walay pagtugot sa Kongreso.
Nakalatid sa kamanduan nga kinahanglan nga kuhaon ang ngalan ni Trump gikan sa titulo, sa façade, ug sa tanang signages ug opisyal nga materyales sulod sa 14 ka adlaw.
Sigon sa tigpamaba sa center, ilang i-apela ang desisyon samtang sa post ni Trump sa social media, gibutyag niini nga magtrabaho siya uban sa Kongreso aron ibalik ang center kanila.
Madumdumang ning miaging tuig, gipahibalo ni Trump ang pagdugang sa iyang ngalan sa institusyon ug uban pang rebranding sa kapital.
Sa Pebrero 2025, gipulihan niya ang pipila ka trustees ug gitudlo ang iyang kaugalingon isip trustee, ug pili siya nga chairman sa arts centre.
