BUTUAN CITY – Gipahibalo sa United States Embassy to the United Nations nga gipahunong ni President Donald Trump ang mga pag-atake sa Iran sulod sa ikaduhang gabii aron hatagan og panahon ang diplomasya.
Sa samang adlaw, gipadayag sa tigpamaba sa Iranian army nga mihunong usab ang Tehran sa ilang “retaliatory attacks” sa rehiyon.
Ang pagpahunong misunod human sa halos duha ka semana nga inaadlaw nga US strikes ug tit-for-tat nga mga atake nga nakapahugno sa ceasefire nga nakab-ot niadtong Hunyo.
Hangtod sa pagkutlo niini nga balita, wala pa makapadayag si Trump sa publiko bahin sa pinakabag-ong kalamboan, apan mas sayo pa nag-post siya og computer-generated images sa Truth Social nga nagpakita sa US military planes nga mitira sa Iranian ships ug sa Kharg Island.
