BUTUAN CITY – Ang wala pag-verify daan sa Department of Health- Central Office sa una nang gitumbok nga tulo ka mga COVID-19 Delta variant cases nga gitala sa Caraga Region niadtong Dominggo ang hinungdan nga na-apil ang Caraga sa mga rehiyong duna na’y kaso sa maong variant.
Gipasabot ni Dr. Dioharra Appari sa eksklusibong pakighinabi sa Bombo Radyo Butuan nga ang maong mga kaso, gikan sa lima ka mga samples nga gipa-ilalom sa bio-sequencing sa Philippine Genome Center gikan sa 12 ka mga crews sa tug boat ug barge nga gikan pa sa Indonesia ug wala sa planong midunggo sa Port of Masao sa Brgy. Lumbocan ning siyudad sa Butuan.
Madumdumang sa lima ka mga samples, unang migawas ang unang duha ka resulta duha ka semana na ang nakalabay, nga positibo kini sa Delta variant ug gisundan niadtong weekend sa laing usa.
Apan mihatag na matud pa og pagpasabot ang ilang sentrong buhatan nga maong mga nagpositibo, mga returning Overseas Filipinos kon ROFs kansa dili pwedeng ma-tag sa region diin sila gikuhaan og specimen.
Hinuon, gihupay sa opisyal ang kabalaka sa mga Butuanon nga posibleng nakatakod na ang maong mga ROFs ngadto sa mga tawong ilang naka-close contact.
Gibutyag niini nga human mibuto ang maong balita, dali nga mihimo og subsob nga contact-tracing ang mga contact-tracers kondiin ang tanang mga indibidwal nga apil sa first generation contact, gi-isolate una og usa ka semana adiser gi-swab test og gihuman gyod ang ilang isolation period bisan og negatibo ang ilang RT-PCR test.
Karong ang Caraga Region na lang sa tanang rehiyon sa nasud ang wala’y kaso sa Delta variant, kanunay nga gipahinumdom ni Dr. Appari sa matag-task force meeting nila nga tabangan kanunay ang mga local government units pag-contain sa transmission apil na sa uban pang mga variants of concern.
