BUTUAN CITY – Gipasabot ni Caloocan Representative Edgar Egay Erice nga ang dili niya pag-apil sa kasamtangang proseso sa impeachment dili tungod sa paglikay niini kundi pagbarug sa iyang prinsipyo og konsensiya.
Sumala pa ni Erice nga ang proseso nga dunay mantsa na sa pagduda og kakulang sa due process of law og posibleng paggamit sa pulitika, dili basta nalang sabayan.
Sumala pa niini nga bisan paman sa pagsugod palang sa proseso sa impeachment niadtong 19th Congress, namantsahan na og pagduda og gipadayon pa sa 20th Congress.
Dugang pa niini, nga wala pa naresolba ang isyu sa maleta og daghang kwarta atol sa 19th Congress tungod kay wala pa kini na-imbestigahan.
Midepensa usab ang kongresista sa pasangil nga gibiyaan na niya ang Liberal Party og karun maka-duterte na kini.
Sumala pa ni Erice nga nagpabilin siyang kritiko sa mga abusado bisan og kini ma-duterte man og Marcos.
Apan kung ang ilang grupo, mag-abusar usab wala na silay kalainan sa ilang gikalaban.
Ang importante matud pa ang mabarog sa tinood og pasagdan na ang kasaysayan nga maoy maghukom sa nabuhat sa matag-usa.
Tungod kay alang kang Erice ang tinood nga away wala nakadepende sa pulitika kundi sa pagpabilin sa integridad og prinsipyo taliwa sa mga kontrobersiya.
