BUTUAN CITY – Gihunong sa Indonesia ang operasyon sa ilang nag-unang international airports gawas sa Jakarta human mikatag ang abo gikan sa bulkan nga Anak Krakatoa, nga nahimutang kapin 150 kilometros ang gilay-on rason nga liboan ka mga pasahero ang naapektuhan sa ilang mga biyahe.
Mibuto ang Mount Anak Krakatoa niadtong Sabado, nga mipagawas og lava ug kusog nga mga pagbusikad nga madungog hangtod sa pipila ka gatos ka kilometro ang gilay-on.
Sumala sa geology agency sa Indonesia, duha pa ka bag-ong pagbuto ang natala kagahapong Dominggo, sumala sa volcanology agency.
Nadiskobrehan ang abo sa bulkan sa airspace palibot sa Soekarno-Hatta International Airport, hinungdan nga gisuspende sa mga awtoridad ang operasyon gikan alas-1:30 sa kaadlawon hangtod alas-5:30 kagahapon sa buntag.
Apan tulo ka higayon kining gilugwayan tungod sa misamot nga pag-alburuto sa bulkan, ug ang pinakabag-ong suspension natapos alas-5:30 sa hapon.
Sumala ni Transportation Minister Dudy Purwagandhi, gisuspende usab ang operasyon sa unom ka mga airports, lakip ang Husein Sastranegara Airport sa Bandung ug Radin Inten II Airport duol sa Bandar Lampung sa isla sa Sumatra.
Gi-andam usab ang ubang mga airports sa mga siyudad sama sa Semarang ug Surabaya isip alternatibong landing areas alang sa mga eroplano.
