BUTUAN CITY – Naka-abot na sa United Arab Emirates (UAE) ang mga pinya sa Pilipinas isip kabahin sa paningkamot sa nasud nga mapalapdan ang merkado sa agrikultura.
Sumala sa Department of Agriculture (DA), 18 metric tons (MT) sa MD2 variety nga pinya ang naka-abot sa UAE ug gipakita sa Al Aweer Fruit and Vegetable Market sa Dubai.
Kini nga kargamento nagtimaan sa pagbalik sa merkado sa Middle East human sa mga problema sa logistics nga naka-apekto sa rehiyon.
Ang kargamento naglangkob sa 1,500 ka kahon sa preskong MD2 nga pinya nga gikan sa mga uma sa Tampakan, South Cotabato ug nakaabot pinaagi sa Port of Khor Fakkan.
Sigon sa DA, ang regular nga kargamento gilauman nga magpadayon matag duha ka semana, nagpakita nga padayon ang panginahanglan sa premium nga tropikal nga prutas sa Pilipinas sa usa sa labing paspas nga nagtubo nga food market sa rehiyon.
Ang pinakabag-ong eksport kabahin sa estratehiya sa ahensya aron maminusan ang pagsalig sa tradisyonal nga merkado sa agrikultura pinaagi sa pagpalapad sa presensya sa Gulf states.
