BUTUAN CITY – Gikondena ni Department of National Defense Secretary Gilbert Teodoro ang sulat nga gipadala sa Chinese delegation atol sa Seoul Defense Dialogue sa South Korea.
Sa maong sulat, gipadayag sa China nga klaro, lig-on ug makanunayon ang ilang posisyon bahin sa West Philippine Sea arbitration, ug dili nila dawaton o ilhon ang arbitration awards ug ang mga claim nga naggikan niini.
Apan gikwestiyon kini ni Teodoro dayong butyag nga ang maong posisyon, nagpakita sa kawala’y respeto dili lamang sa international law ug sa United Nations Convention on the Law of the Sea o UNCLOS, kondili usab sa host country nga South Korea.
Sigon ni Teodoro, ang maong pamatasan mahimong ikonsiderar nga coercion, bullying, ug aggression.
Gihatagan usab niya og gibug-aton ang kamahinungdanon sa respeto ug hustong pamatasan sa pag-apil sa mga international forums.
