BUTUAN CITY – Nakatutok na karon ang serbisyo sa kapulisan diha sa community partnership kondiin gipakusgan ang koordinasyon tali sa kapulisan, mga local government units kon LGUs, government agencies, mga tunghaan ug komunidad.
Kini subay na sa ika-32 ka tuig nga pagsa-ulog sa National Crime Prevention Week sugod niadtong Septembre 1 hangtud ugmang adlawa, Septembre 7 nga nagsabak sa temang “Strengthening Civilian Oversight and Collective Action for Safer Communities.”
Sa eksklusibong pakighinabi sa Bombo Radyo Butuan, gipadayag ni Atty Luis Jude Rey Sy, hepe sa Technical Services Division sa National Police Commission kon NAPOLCOM-Caraga nga ang selebrasyon, base na usab sa presidential decree nga nagmando nga saulugon kini kada-unang semana sa buwan sa Septembre.
Suportado matud pa kini sa ubang mga national government agencies sama sa Bureau of Fire Protection kon BFP, Bureau of Jail, Management and Penology kon BJMP, Department of Interior and Local Government kon DILG ug mga Local Government Units kon LGUs.
Giklaro pa ni Atty Sy nga ang kasa-ulugan ning tuiga, sentro niini mao nga ang crime prevention nga trabaho sa pulis dili lang ila kundili shared responsibility sa gobyerno, komunidad ug mga ordinaryong lungsoranon.
Niini nga kasa-ulugan, mas gipalig-on nga civilian participation kondiin gidasig ang mga residente nga mu-apil sa pag-monitor sa peace and order, pag-report sa ilang mga concerns, ug pakigtambayayong sa mga otoridad.
Usa sa mga gipunting karong tuiga mao ang pagpanalipod sa mga eskwelahan ug pag-edukar sa mga estudyante bahin sa responsible behavior ug crime prevention.
Anaa usab ang pamilya isip unang depensa batok sa krimen kondiin manguna ang Commission on Population and Development diha sa disiplina, maayong values ug parental guidance nga magsugod mismo sa panimalay.
