BUTUAN CITY – Gideklara na nga epidemya ang leptospirosis sa Manila human misaka pag-ayo ang gidaghanon sa mga kaso niini – kansa usa ka bacterial infection nga kasagarang makuha pinaagi sa paghumol sa tubig o lapok nga duna’y ihi sa mga ilaga.
Mas dako ang risgo nga matakdan niini panahon sa pagbaha, ilabina kung adunay samad sa panit nga ma-expose sa kontaminadong tubig.
Sumala sa mga health authorities, dakong kabahin sa pagtaas sa mga kaso ang kanunay nga pagbaha nga nasinati sa Metro Manila. Ang leptospirosis magsugod sa mga sintomas sama sa hilanat, sakit sa ulo, pagluya ug kasakit sa kaunoran.
Apan kung dili matambalan dayon, mahimo kining mosangpot sa seryosong komplikasyon nga makaapekto sa mga kidney, atay ug uban pang importanteng organo.
Tungod niini, gipahinumdoman ang publiko nga likayan kutob sa mahimo ang paglusong o paglangoy sa baha.
Kung dili malikayan ang pagtabok sa baha, importante nga protektahan ang mga samad sa panit ug manghugas dayon gamit ang limpyo nga tubig ug sabon human ma-expose.
Ang mga nakalusong sa baha nga makasinati og mga sintomas sa leptospirosis kinahanglan nga magpakonsulta dayon sa health center o doktor aron mahatagan og hustong assessment ug tambal.
