BUTUAN CITY – Pinal na ang work stoppage order nga gipahamtang sa Department of Labor and Employment-National Capital Region no DOLE-NCR batok sa unom ka mga barko sa Atienza Shipping Lines, human nasunog ang MV June Aster.
Sumala ni DOLE-NCR Regional Director Roi Buenafe, nadiskubrehan sa inspeksyon sa mga barko sa kompanya sa Navotas City ang kawala’y Occupational Safety and Health o OSH program, mga safety officers, ug emergency preparedness module sa mga niini.
Lakip kini sa mga kalapasan sa safety standards nga kinahanglan masulbad sa kompanya human sa insidente sa MV June Aster nga mipatay sa 77 ka mga tawo.
Tungod sa work stoppage order, dili pa mahimong mubiyahe ang unom ka barko hangtod dili matul-id sa kompanya ang mga kakulangon nga nadiskubrehan sa inspeksyon.
Apan gipasalig ni Buenafe nga magpadayon ang paghatag sa sweldo sa mga trabahante bisan pa og dili pa makapadayon sa operasyon ang mga barko.
Gihatagan ang kompanya og 10 ka adlaw o hangtod Oktubre 23 aron makatuman sa mga kinahanglang nilang sundon ug kung mapakyas, mahimo silang pahamtangan og administrative penalty nga mu-abot sa ₱100,000.
Samtang, nagpasidaan si DOLE Secretary Francis Tolentino sa mga shipping companies nga hugot nga tumanon ang occupational safety standards aron masiguro ang kaluwasan dili lamang sa mga tripulante kondili apil usab sa mga pasahero.
