BUTUAN CITY – Mibati og kasakit alang sa katawhan sa West Kalimantan kon West Borneo sa Indonesia sa mga biktima sa forest fires, si Bombo international correspondent to Indonesia Pastor Jerson Labadia.
Kini tungod kay pila na ka higayon niyang nabisita ang maong lugar dihang wala pa kini malamoy sa kalayo.
Sa eksklusibong pakighinabi ning sibyahan, gipadayag ni Pastor Labadia nga ang maong lugar, usa sa gi-ilang duna’y pinakadakong African palm plantation sa tibuok kalibutan.
Nagsugod matud pa ang lapad nga sunog dihang pipila sa mga tawong gustong magnegosyo sa African palm nagsunog, apan tungod sa ka-uga sa palibot tungod sa grabeng ka-init sa panahon, wala na mapalong pa ang kalayo ug padayong mikaylap hinungdan sa paspas nga pagdako niini.
Base sa monitoring sa gobyerno gamit ang mga drones, nasuta nga duna matud pa’y pipila ka sunog nga mamatay o mapalong na, apan naa napo’y mu-ulbo sa laing lugar rason nga padayon gihapon ang forest ug peatland fires.
Sa pagkakaron, gipadayag ni Pastor Labadia nga duna na’y nadakpan nga pipila ka mga indibidwal nga gitu-uhang nalambigit sa pagsunog sa plantasyon samtang nagpadayon ang imbestigasyon.
Sa pagkakaron, kanselado na ang mga klase ug trabaho sa mga apektadong lugar tungod sa kabaga na sa aso kon haze kondiin lisod na ang visibility ug ang ubos nga kalidad sa hangin.
