BUTUAN CITY – Malampusong gipahigayon sa nagkada-iyang probinsya ug dakbayan sa Caraga Region ang ikatulong Nationwide Simultaneous Earthquake Drill o NSED isip kabahin sa padayong paningkamot sa mga otoridad aron ma-andam ang publiko sa posibleng kusog nga linog.
Sigon ni Carlo Boneto Becera, tigpamaba sa Office of the Civil Defense kon OCD-Caraga, apil sa maong earthquake drill ang mga ahensya sa gobyerno, local government units, mga eskwelahan, pribadong establisemento ug uban pang sektor sa komunidad.
Pinaagi sa maong drill, gipraktis sa mga partisipante ang hustong buhaton panahon sa linog, ilabi na ang “Duck, Cover and Hold”, diin kinahanglan nga moluhod o moyukbo, salipdan ang ulo ug lawas ilalom sa lig-on nga lamesa o gamit, ug mokupot niini hangtod mohunong ang pag-uyog.
Gipraktis usab ang organisadong pag-evacuate ngadto sa designated safe areas ug ang pagtabang sa mga tawo nga posibleng ma-trap o ma-injure panahon sa usa ka tinuod nga linog aron mahimo na kining muscle memory o mutatak na sa alimpatakan higayong duna’y kusog nga linog.
Dugang pa ni Becera, importante ang kanunay nga pag-apil sa earthquake drill tungod kay dili matagna kung kanus-a mahitabo ang usa ka linog.
Pinaagi sa regular nga praktis, mas mahibalo ang mga tawo unsaon paglihok sa unang mga segundo sa linog, nga importante aron malikayan ang kalibog, panic ug dugang nga kadaot.
Ang kalampusan sa ikatulong NSED sa Caraga nagpakita usab sa koordinasyon tali sa mga disaster response agencies, mga local government units kon LGUs, eskwelahan, pribadong sektor ug komunidad.
Gipahinumdoman ang publiko nga dili lamang panahon sa drill kinahanglan nga mahibalo sa earthquake safety procedures, kundili kinahanglan kining mahimong andam nga tubag sa matag-pamilya ug komunidad alang sa posibleng tinuod nga linog.
