BUTUAN CITY- Gikondena ni Jeffrey “Ka Eric” Celiz, Secretary General sa Bangon Sambayanan, ang panawagan sa pipila ka senador, ilabina sa majority, nga ipaubos ang threshold sa gikinahanglang boto alang sa conviction sa usa ka impeachment trial.
Sumala ni Celiz, ang maong lakang mahimong dakong hulga sa pagsunod sa Konstitusyon ug mahimo usab nga pagmaniobra sa klarong probisyon niini. Iyang gipasiugda nga sumala sa Konstitusyon, gikinahanglan ang two-thirds nga boto sa tanang miyembro sa Senado aron makab-ot ang conviction sa impeachment case.
Sigon usab niini, nga adunay jurisprudence ang Korte Suprema nga nagpalig-on sa interpretasyon nga ang basihan mao ang tanang miyembro sa Senado ug dili lamang ang mga senador nga present o aktuwal nga mibotar panahon sa proceedings.
Sumala pa ni Celiz, wala sa Konstitusyon ang probisyon nga nag-ingon nga ang ihap limitado lamang sa mga miyembro nga anaa sa Senado, anaa sa nasod, o adunay katungod nga mobotar sa maong higayon. Busa, iyang gipasiugda nga magpabilin nga 24 ka senador ang constitutional composition.
