BUTUAN CITY – Padayon ang pagbangon ug damage assessment sa Nagoya, Japan human sa grabeng pagbaha nga resulta sa grabeng pag-ulan nga mi-angol na sa 41 ka mga tawo samtang kapin 200 ka sakyanan ang nabahaan o nadaot, ug naparalisar usab sa makadiyot ang bus ug subway services sa siyudad.
Nakatala ang Nagoya og 104.5 millimeters nga ulan sulod lamang sa usa ka oras, hinungdan sa pagbaha sa daghang dalan ug kabalayan.
Mokabat sa 3,500 ka mga residente ang nangita’g kapasilongan sa mga evacuation centers samtang mga 400 ka atleta ug opisyal sa umaabot nga Asian Games ang temporaryong gipabalhin sa mas taas nga lugar apan nakabalik na human maibsan ang sitwasyon.
Bisan pa sa pagbaha, gipasalig sa mayor sa Nagoya nga walay dakong kadaot sa mga venue ug magpadayon sa gikatakdang petsa ang Asian Games nga magsugod sa Setyembre 19.
