BUTUAN CITY– Gibasura sa Supreme Court ang conviction ni kanhi First Lady Imelda Marcos may kalabotan sa pito ka kaso sa graft tungod sa iyang giingong financial interests sa pito ka Swiss foundations.
Sa desisyong gipetsahan og Hunyo 10, 2026 ug gipahibalo sa publiko kagahapon Miyerkules, Setyembre 9, gibali sa First Division sa Korte Suprema ang 2018 nga ruling sa Sandiganbayan nga nakakaplag kang Marcos nga guilty sa pito ka counts of graft.
Matud sa Supreme Court, dili madawat ug kulang sa probative value ang testimonial ug documentary evidence nga gipresentar sa prosecution, ilabina ang mga dokumento gikan sa Switzerland nga wala hustong ma-authenticate ug walay credible witness nga nakapamatuod sa ilang pagkakasaligan.
Giklaro usab sa Korte nga ang pag-abli og bank accounts, pagbalhin og pondo ug pag-angkon og interest o investment profits dili awtomatikong nagpasabot nga ang usa ka foundation usa ka commercial enterprise o nagpadagan og negosyo.
Tungod sa kapakyasan sa prosecution nga mapamatud-an nga ang mga foundation aktibong nagbaligya og produkto o serbisyo alang sa pagpanansya, giingon sa Supreme Court nga dili sakop sa gitakda sa balaod ang maong financial interests, ug ang mga pagduhaduha kinahanglan masulbad pabor sa akusado.
