BUTUAN CITY- Temporaryong gisirad-an sa Saudi Arabia ang 1,200-kilometros nga East-West oil pipeline human kini gi-atake sa mga drone nga gilunsad gikan sa Iraq, nga miresulta sa mga kadaot ug pagkaguba sa palibot sa pasilidad ug nagtimaan sa dakong paglala sa nagkadaghang panagbangi sa Middle East.
Giila sa Iraq, nga ang mga drone gilunsad gikan sa Maysan province, nga duol sa utlanan sa Iran, ug gikuhaan sa katungdanan ang lokal nga military operations commander samtang gilunsad ang imbestigasyon.
Sumala sa Riyadh, dili pa kini mobalos sa pag-atake ug mosuporta sa paningkamot sa gobyerno sa Iraq nga mapugngan ang susamang mga pag-atake, apan mipahimangno nga andam kini mohimo sa gikinahanglang mga lakang aron mapanalipdan ang iyang soberanya ug importanteng imprastraktura.
Samtang, ang mga Houthi nga suportado sa Iran nagpadayon sa pagpalapad sa ilang kontrol sa baybayon sa Yemen sa Red Sea, lakip ang estratehikong lungsod sa Mokha ug mga bahin sa Bab al-Mandab Strait, nga nagpadako sa kabalaka sa posibleng pagkabalda sa global oil shipments.
Tungod ang Saudi pipeline nagdala og gibanabanang 4% hangtod 5% sa global oil supply ug misaka na sa kapin $100 kada baril ang presyo sa krudo, misamot ang kahadlok sa dugang nga pagsamok sa suplay sa enerhiya, pagtaas sa inflation, ug epekto sa global trade.
