BUTUAN CITY – Gihulagway ni Lay Theologian Bro. Wilson Amad nga usa ka dakong oportunidad alang sa matag-Bangsamoro ang pag-abli sa mga presinto karong adlawa alang sa unang Bangsamoro Autonomous Region in Muslim Mindanao kon BARMM parliamentary election, aron mapanalipdan ang ilang kaugmaon.
Sigon ni Amad, importante ang paghatag og bili sa mga sakripisyo sa mga unang nanglimbasog alang sa Bangsamoro, pinaagi sa pagpanalipod sa matag-boto batok sa pagpugos ug pagpanghilabot sa mga politiko.
Kinahanglan matud pang magpabiling neutral ang mga magtutudlo, kapulisan ug militar aron mapreserbar ang kalinaw ug malikayan nga ma-impluwensyahan sa interes sa mga politiko ang proseso sa eleksyon.
Nagpasidaan usab si Amad batok sa bisan unsang pagpanghilabot sa nasyonal nga gobyerno ug sa mga kandidato nga gipaluyo gikan sa Manila.
Gibutyag niining importante nga malikayan ang maong pagpanghilabot aron dili na usab mosiklab ang gubat ug kagubot sa Bangsamoro.
