BUTUAN CITY – Gipalong sa Saudi Arabia ang usa ka importanteng oil pipeline human kini gi-atake sa mga drones nga gilunsad gikan sa Iraq, samtang nagkalapad ang gubat ug tensyon sa Middle East.
Mi-angkon ang Iraq nga ang pag-atake naggikan sa usa sa mga probinsya niini nga duol sa Iran, ug tungod niini, gipangtangtang sa katungdanan ang usa ka military commander ug gilusad ang imbestigasyon.
Ang 1,200-kilometros nga East-West pipeline importante sa Saudi Arabia tungod kay makatabang kini sa pag-eksport sa lana nga dili na mu-agi sa Strait of Hormuz, usa sa pinaka-importanteng agianan sa oil shipments sa kalibutan.
Sigon sa Saudi Foreign Ministry, gipahunong ang operasyon sa pipeline isip pag-amping, human adunay mga nasamdan ug kadaot nga resulta sa pag-atake ug padayon pang gi-assess ang extent sa damage.
Gibana-bana nga ang pipeline nagdala og 4 hangtod 5 porsyento sa global oil supply.
