BUTUAN CITY – Gipahibalo ni Brig. Gen. Seigfred Tubalado sa 403rd Infantry “Peacemaker” Brigade nga magpadayon ang operasyon sa militar alang sa seguridad sa mga komunidad, human sa sunod-sunod nga engkwentro nga mikalas sa kinabuhi sa upat ka miyembro sa New People’s Army o NPA.
Sa maong operasyon, unom ka high-powered firearms ang nakumpiska ug tulo pa ka mga rebelde ang boluntaryong misurender sa mga tropa sa gobyerno.
Nahitabo ang mga engkwentro niadtong September 10, 2026, sa kabukiran sa Barangay Bakingking, Esperanza, Agusan del Sur, tali sa mga pwersa sa gobyerno ug mga armadong miyembro sa North Central Mindanao Regional Committee o NCMRC.
Sumala sa 403rd Infantry Brigade, usa sa mga namatay mao si Julia Cagadas, alyas Rheda, Tiyang, Yoko ug Kayuka, nga giila isip secretary sa NCMRC. Ang tulo pa ka namatay mao sila Jonny Almonte Lindayo, alyas Kikoy/Bugkoy; Rochamea Bihag, alyas Makli; ug Gerald Basacon, alyas Doydoy.
Samtang, tulo ka miyembro sa NCMRC ang misurender usab sa tropa sa gobyerno. Giila sila sa mga alyas nga Lian, Mayumi ug Erin.
Matud sa militar, magpadayon ang operasyon aron awhagon ang nahibiling mga rebelde nga malinawong mosurender ug malikayan ang dugang pagkalagas sa kinabuhi.
Sumala usab kang Lt. Col. Jeorge Ramiro Jallorina, commander sa 8th Infantry Battalion sa Philippine Army, ilang ipahigayon ang mga operasyon nga adunay propesyonalismo, disiplina ug pagtahod sa tawhanong katungod.
