BUTUAN CITY – Nakalusot na sa House Committee on Dangerous Drugs ug Committee on Health ang hini-usang bag-ong balaudnon nga nagtinguha nga himuong tambal sa sakit ang cannabis o marijuana.
Ang maong sugyot gibanhaw pag-usab sa ika-20 nga Kongreso human kini napakyas pagpalig-on sa mi-aging mga Kongreso.
Ang medical cannabis legal nga gigamit sa pipila ka mga nasod sama sa Canada, Germany, Israel, Australia, ug bisan sa pipila ka mga estado sa United States alang sa mga adunay kondisyon sama sa epilepsy, nausea ug uban pa.
Sumala sa anti-narcotics body, ang cannabis gi-isip gihapon nga delikado nga klase sa droga.
Kung kini mapalig-on, makabaton og access sa medical cannabis ang mga nanginahanglan niini, apan kinahanglan kining gamiton lamang isip medikasyon ug dili alang sa overdose o bisyo.
Gipadayag sa Comprehensive Dangerous Drugs Act of 2002 nga ang pagtanom, pagpanag-iya, paggamit, pagbaligya, pag-administer, pagdispensa, pag-deliver ug pag-apod-apod alang sa transportasyon sa marijuana, pabilin nga silotan ubos sa balaod.
