BUTUAN CITY- Nanawagan si Davao City 1st District Representative Pulong Duterte og komprehensibo ug dili ‘selective’ nga imbestigasyon sa natigayong extrajudicial killings niadtong panahon sa amahan niining si kanhi Pres. Rodrigo Duterte.
Kini subay sa pagtukod og Truth Commission, usa ka grupo nga gimugna sa mga human rights advocate nga gipangunahan ni kanhi International Criminal Court kon ICC Judge Raul Pangalangan.
Gi-insistar sa presidential son, nga dili mahimong pili lang ang gustong pangitaan og kamatuoran, inay kinahanglang mahimong kumprehensibo ang himuong imbestigasyon sa maong komisyon.
Ang mga tahong pagpatay, kinahanglan matud pa og hugot nga imbestigahan ug ang kinsa mang matumbok nga responsable kinahanglang mapanubag, apan kung tinuod nga Truth Commission ang gitukod sa komisyon, dili kini magpukos lang sa ‘pipila ka kamatuoran’ kundi sa tibuok kamatuoran.
Gikwestyon usab sa magbabalaod, nga kung tinuod ang Truth Commission, ngano matud pa adunay truth nga naka-fast track ug adunay truth nga naka-pending.
Gihulagway usab sa magbabalaod ang isyu sa mga anomalosonmg flood control projects nga angay matud pang bantayan sa mga investigating panel sama sa Truth Commission.
Matud pa niini, kinahanglan kini ang maghimong focus sa mga imbestigador ug suta-on kung asa napadulong ang kwarta, kinsa ang nakapahimolos, Kinsa ang nagsugyot sa mga proyekto, ug kinsa ang nagprotekta sa mga nalambigit.
