BUTUAN CITY – Pila ka minutos lang human naka-abot sa mga tunghaan ning siyudad sa Butuan alang sa opening sa school year 2026-2027, dali ra usab nga gipa-uli ang mga mgtutungha human ang magnitude 7.8 nga linog nga mitay-og sa Mindanao human gisuspende sa lokal nga kagamhanan ang klase aron masiguro ang kaluwasan sa tanan.
Tungod kay unang adlaw man sa klase, ug na-atol usab nga ting-flag ceremony, wala’y natalang na-angol gikan sa managlahing tunghaan ning siyudad.
Samtang gipadayag usab ni school principal Marivic Patonial sa FR Sibayan Elementary School sa Brgy Baan Km 3 ning siyudad nga wala’y kabalak-an sa ilang eskwelahan tungod kay earthquake resilient man ang ilang mga building.
Gani sa ilang gihimong inspeksyon, wala sila’y nakitang duna’y nag-crack apan bisan pa man, ila gihapong gipa-uli ang ilang mga bata human sa 30-minutos nga orientation og pag-ila ila sa ilang mga magtutudlo.
