BUTUAN CITY-Nakagawas na si Mary Jane Veloso human sa dul-an 15 ka tuig nga pagkapriso ug pag-atubang sa death row sa Indonesia, sa wala pa kini gipabalik sa Pilipinas niadtong 2024 ug sa ulahi gihatagan og absolute pardon ni President Ferdinand Marcos Jr.
Ang absolute pardon nagpasabot sa hingpit nga pagpabalik sa civil ug political rights sa usa ka indibidwal ug pagwagtang sa nahibiling silot nga walay kondisyon.
Nadakpan ug gisentensiyahan og kamatayon si Veloso niadtong Oktubre 11, 2010 human nadiskobrehan nga ang iyang gidala nga maleta adunay 2.6 kilos nga heroin.
Apan niadtong 2015, napulihan ang iyang death sentence og mas gaan nga silot human sa pag-apelar ni Kanhi President Benigno “Noynoy” Aquino III.
Niadtong Disyembre 2024, gitugotan sa mga awtoridad sa Indonesia ang pagbalhin sa kustodiya kang Veloso ngadto sa Pilipinas, diin gipabilin kini sa Correctional Institution for Women o CIW sa Mandaluyong City.
Una nang nanawagan ang mga kabanay niini ug nagkalain-laing grupo alang sa iyang kagawasan ug mihangyo kang Marcos nga hatagan kini og pardon.
