BUTUAN CITY – Natapos na ang kampanya ni Pinay tennis star Alex Eala sa 2026 US Open human siya gipildi sa American player nga si Iva Jovic sa usa ka grabe ka-dikit nga sangka sa Round 3 kaganina.
Nindot ug agresibo ang pagsugod sa duwa alang sa duha ka magdudula kondiin pareho silang wala magpugong sa ilang mga atake, samtang nag-ilis-ilis sila og kusog nga tira ug taas nga rallies. Human sa usa ka hugot nga first set, si Jovic ang nakakuha sa unang puntos sa duwa, 7-5.
Namwi dayon si Eala sa ikaduhang set kondiin mas mipakusog siya sa iyang mga atake, nakakuha og momentum, ug mas nakontrol ang dagan sa duwa hinungdan nga iyang nakuha ang second set, 6-3, aron itabla ang away sa usa ka set matag usa.
Sa deciding set, mipakita pag-usab si Eala sa iyang fighting spirit ug nakakuha pa gani og sayong 2-0 nga bentaha apan dali usab naka-recover si Jovic ug natabla ang duwa sa 2-2.
Mibawi pag-usab si Eala ug milabaw og 4-2, apan wala musurender ang American player. Misamot ka-dikit ang panagsangka samtang ang duha nagpadayon sa pagpakita og kusog nga mga tira, paspas nga exchanges, ug taas nga rallies.
Naka-una si Jovic og 5-4 ug hapit na unta niya masira ang duwa apan gipakita ni Eala ang iyang kaisog ug determinasyon, nakigbisog pag-ayo hangtud nga natabla sa 5-5.
Sa katapusang mga puntos, nagpabiling kalmado ug lig-on si Jovic hangtud nga iyang nasira ang deciding set sa 7-5, aron makuha ang kada-ugan ug maka-abante sa sunod nga round.
