BUTUAN CITY – Giklaro sa International Criminal Court (ICC) nga nakadepende sa kooperasyon sa gobyerno sa Pilipinas ang pagpatuman sa mga arrest warrant ug pagsurender sa mga suspek sa tribunal.
Kini ang misunod sa kumpirmasyon ni ICC spokesperson Oriane Maillet nga duna nay warrant of arrest batuk kang Senador Ronald “Bato” dela Rosa, nga gikonsidera matud pang co-perpetrator” ni kanhe Pangulong Rodrigo Duterte sa mga kasong crimes against humanity mahitungod sa “war on drugs”.
Gihimo sa opisyal sa ICC ang pamahayag human ang ginukdanay ug pakyas nga pag-aresto sa mga ahente sa National Bureau of Investigation (NBI) sa Senador sa premises mismo sa Senado niadtong Lunes, Mayo 11, 2026.
Sigon ni Maillet, tungod kay ang ICC usa ka institusyong panghukum nga nakaangkla sa kooperasyon sa mga estado, anaa sa kamot sa mga nasudnong awtoridad ang pag-aresto ug pagsurender sa suspek.
Gitin-aw usab niini nga kung dunay mga kabalaka ang estado sa pakig-alayon mamahimo silang mokonsulta sa korte alayon sa Rome Statute.
Gidugang pa sa opisyal sa ICC nga bisan og mihawa ang Pilipinas sa korte niadtong 2019, wala kini makaapekto sa katungdanan niining makig-tinabangay sa mga kriminal nga imbestigasyon ug pagtaral, base sa Article 127 sa Rome Statute
