BUTUAN CITY – Hustisya ang singgit sa pamilya Baterbonia sa kamatayon ni Rene Baterbonia samtang anaa sa boot camp sa Ateneo Blue Eagles men’s basketball sa Dipaculao, Aurora niadtong Lunes, Hunyo 8.
Pursigido ang inahang si Rovelyn Baterbonia nga pa-imbestigahan ang nadangatan sa iyang anak kinsa namatay human matud pa nalumos ka-uban ang lain pang basketbolistang si Divine Adili.
Sa iyang pag-atubang sa mga reporters paghidangat sa kauluhang Manila, gipadayag ni Rovelyn nga sakit kaayo alang kaniya nga wala siya gi-istorya og klaro sa mga nagdala sa iyang anak tungod kay ang gipatuo kaniya team building lang apan training na diay ang ilang gihimo.
Kung nasayod matud pa siya nga mao kini ang maagi-an sa iyang anak, dili niya kini ipadayon sa maongkoponan bisan og kabus sila tungod kay prayuridad niya ang kaayuhan sa kinabuhi sa iyang mga anak.
Iya usab nga gikwestyon ang pagbaton og daghang lagom sa lawas ni Rene ug ang paghigot og bug-at nga butang sa mga tiil ug kamot niini rason nga wala na kini makalangoy pa dihang na-igo sa dagkong balud.
Dugang pa sa inahan, naka-text pa ang iyang anak nga usa ka semana silang dili magkupot og cellphone samtang anaa sa training matud pa sa Baler.
Blind matud pa siya nga daw military training na ang gi-apilan sa iyang anak dayong kwestyon nganong gipalangoy kini sa dagat nga unta basketball man ang talent niini.
Ang mas gikasakit pa niya wala man lang siya padalhi og mga hulagway sa iyang anak bisan niadtong higayon nga nakuha na nila kini sa dagat.
Dismayado sila tungod kay giguba matud pa sa Ateneo Blue Eagles ang pangandoy sa iyang anak ilabina nga sa kadaghan nila nag-uban, wala mana lay nag-rescue kang Rene. Iya usab nga gikwestyon kung nganong wala’y staff sa maong koponan nga nag-uban sa iyang anak dihang gikuha na kini sa taga-punerarya nga wala man lang usab matud pa suuti og t-shirt.
Mas nahimong emosyunal si Rovelyn dihang sa paghilak niya og maayo, mitulo usab ang luha sa iyang anak dihang nakabati sa iyang tingog nga daw nabati niini ang kasakit nga iyang gihambin.
Dako ang iyang pagtuo nga duna’y foul play nga nahitabo sa iyang anak tungod sa kadaghan sa mga lagom niini sa lawas.
