BUTUAN CITY – Sugdan na ang “lie in state” o haya sa gipatay nga Supreme Leader sa Iran nga si Ayatollah Ali Khamenei karung adlawa, Sabado, Hulyo 4, 2026, sa Grand Mosalla mosque sa Tehran.
Dinhi dad-on ang iyang lawas, nga nasulod sa usa ka lungon, aron hatagan og higayon ang publiko ug ang mga lider gikan sa nagkalain-laing nasod sa paghatag sa ilang katapusang pagtahod.
Madumduman nga napatay si Khamenei niadtong Pebrero 28, 2026, pinaagi sa usa ka airstrike sa U.S. ug Israel.
Nalangan og upat ka bulan ang iyang pagpalubong tungod sa gubat ug isyu sa seguridad, apan karon nga duna na’y gipatuman nga ceasefire, gihan-ay na ang 7 ka adlaw nga prosesyon.
Kagahapon, Hulyo 3 (Biyernes), niabot na ang iyang lungon sa Tehran alang sa usa ka pribadong seremonya kauban ang mga delegasyon gikan sa laing nasod ug mga opisyal.
Sa Sabado ug Domingo usab, opisyal nga ibutang ang iyang lawas sa Tehran Grand Mosalla Mosque aron makita sa publiko.
Sa Hulyo 6 (Lunes), ipahigayon ang funeral procession sa mga karsada sa Tehran.
Sa Hulyo 7 (Martes), dad-on ang lungon ngadto sa balaang siyudad sa Qom alang sa pag-ampo sa mga iskolar sa Islam.
Sa Hulyo 8 (Miyerkules), ilupad ang iyang lawas paingon sa Iraq alang sa prosesyon sa mga sagradong siyudad sa Shia, ang Najaf ug Karbala.
Sa Hulyo 9 (Huwebes) usab ibiyahe pabalik sa Iran ang iyang lawas aron hingpit nga ilubong didto sa Imam Reza Shrine sa iyang natawhang lungsod sa Mashhad.
Gilauman sa mga opisyal sa Iran nga anaa tali sa 15 hangtod 20 ka milyong tawo ang mosalmot sa tibuok semana nga kalihokan.
Kabahin niini, nagdeklara na og “public holidays” o walay trabaho ug klase sa mga siyudad nga agian sa lungon.
Isira usab ang airspace sa Tehran ug Mashhad sa mga partikular nga adlaw alang sa seguridad.
Pabilin nga dili segurado kon motambong ba sa maong lubong ang iyang anak ug ang bag-ong gitudlo nga Supreme Leader sa Iran nga si Mojtaba Khamenei.
