BUTUAN CITY – Gi-activate na sa lokal nga kagamhanan ning siyudad sa Butuan ang Task Force Awas, aron maka-aksyon gilayon ug ma-mobilize sa city government ang gikinahanglang lakang uban sa pakig-alayon sa Butuan City Water District kon BCWD ilabina sa panahon nga kinahanglan na ang pag-rasyon og tubig.
Gipasabot ni Butuan City Mayor Lawrence Lemuel Fortun nga mahinungdanon ang pagpa-ilalom sa siyudad sa state of calamity tungod sa kawala’y paglambo sa krisis sa suplay sa tubig human nasuta sa iyang pagpatawag og meeting uban sa mga technical men sa BCWD ug sa city government nga kinahanglan pang pakusgon ang intervention nga gihimo.
Sa iyang gipagawas nga video statement, gipadayag sa mayor nga human ang tigom, nagdugang gilayon ang lokal nga kagamhanan og dugang kagamitan aron mapakusgan ang pagrasyon og tubig ingon man ang dugang water sourcing.
Dugang pa ni Mayor Fortun, pinaagi sa pagpa-ilalom sa siyudad sa state of calamity, mapadali ang paghimo og emergency action gamit ang pundo nga dili na mu-agi sa naka-andang proseso sa pagpagawas niini.
Gawas pa niini, ang pag-mobilize unya sa city government sa entiro government approach nga lambigitan sa tanan dili lang sa lokal nga kagamhanan ug sa BCWD.
Pinaagi matud pa sa deklarasyon, mapanalipdan unya sa city government ang panglawas sa publiko nga maoy unang ma-apektuhan higayong duna’y krisis sa tubig gawas nga makapangayo pa og assistance ngadto sa mga hingtungdang government-line agencies kung kinahanglan na.
Bisan matud pa og mahimo nang normal ang water supply sa siyudad, magpadayon ang ilang medium term interventions sama sa pagmontar og water supply systems sa mga ma-apektuhang barangay.
