BUTUAN CITY – Gipadayag ni Michiko De Jesus, tigpamaba sa Butuan City Government nga hulaton na lamang ang guidelines nga himoon sa siyudad may kalabutan sa saktong presyo sa face shield.
Sigon sa opisyal sa eksklusibong pakighinabi sa Bombo Radyo Butuan, lakip kini sa unod sa ipagawas nga executive order sa lokal nga kagamhanan sa dakbayan.
Apan sa kasamtangan, kinahanglang sundon una ang girekomenda sa nasyunal nga kagamhanan mahitungod sa suggested retail price kon SRP sa mga face shields.
Nasayrang base sa memorandum 2020-0345 sa DOH nga pirmado ni Secretary Francisco Duque III, nakalatid nga dapat magdula lang gikan sa P26.00 hangtud P50.00 ang kada-usa ka face shield.
Nakalatid usab sa maong memorandum ang specifications sa mga face shields apil niini nga kinahanglang gama kini sa clear plastic o accetate material nga maghatag og good visibility sa mga mugamit.
Dapat fog resistant usab kini ug adjustable bant aron muha-um sa ulo ug komportableng mudikit sa agtang ug kinahanglang matabunan usab niini ang tibuok nawong ug gama sa lig-ong materyales ug daling mahinlu-an.
Gitugutan usab sa DOH ang pagtaas og hangtud sa 10% kung ibaligya kini sa Visayas ug Mindanao aron matapalan ang gasto sa pagbiyahe.
