BUTUAN CITY – Gipasalig ni impeachment court spokesperson Atty Regie Tongol nga dili tinuod ang pamahayag nga dili welcome sa impeachment trial ni Vice President Sara Duterte si kanhi senador Antonio “Sonny” Trillanes IV.
Sigon ni Tongol, nangayo ang House prosecution panel og mga subpoena alang sa pipila ka mga testigo, apan wala gilakip ni prosecutor Terry Ridon si Trillanes sa mga testigong ilang planong ipatawag ning miaging adlaw.
Sa dihang gipahibalo sa prosecution nga posibleng motestigo si Trillanes niadtong Miyerkules, wala na kuno’y igong panahon ang korte aron makapagawas og subpoena alang sa sunod nga adlaw.
Bisan pa niini, giklaro sa korte nga mahimo gihapon si Trillanes nga motunga ug motestigo boluntaryo.
Gipasabot usab ni Tongol nga gikuwestiyon sa presiding officer ang timing sa testimonya ni Trillanes tungod kay naka-iskedyul kini nga motudlo o motuki sa mga bank records nga wala pa kaniadto maipresentar atubangan sa impeachment court.
Samtang, giingon ni Tongol nga mahimo gihapon ipatawag sa prosecution si Trillanes kung importante sa kaso ang mga ebidensyang anaa sa iyang pagpanag-iya.
Nagpabilin usab ang kanhi senador isip common witness sa prosecution ug defense, busa mahimo gihapon siyang ipresentar sa bahin sa depensa.
