BUTUAN CITY – Gidala sa ospital ang contractor nga si Pacifico “Curlee” Discaya II aron mopailalom sa operasyon sa iyang abaga.
Sumala ni Senate Secretary Mark Llandro “Dong” Mendoza, gi-aprobahan ni Senate Blue Ribbon Committee chairman Panfilo Lacson ang hangyo sa kampo ni Discaya.
Gidugang pa niini nga posible nga magpabilin siya sa ospital sulod sa upat hangtod pito ka adlaw.
Base sa proseso, nakaposas ang mga kamot ni Discaya sa wala pa siya gipahawa gikan sa Senado.
Gipaneguro usab sa Senate Secretary nga hugot ang pagbantay sa Senate Security kang Discaya samtang anaa siya sa balay tambalanan.
Gawas pa niini, estrikto usab sila sa mga gustong mbisita gikan alas-8 sa buntag hangtod alas-5 sa hapon.
Mahinumduman nga sukad pa niadtong Setyembre 2025, nakabilanggo na sa Senado ang contractor human siya ma-cite in contempt sa Senate Blue Ribbon Committee tungod sa pagdungog sa anomalya sa mga flood control projects.
