BUTUAN CITY – Padayon pang gi-imbestigahan sa Bureau of Fire Protection kon BFP-Butuan ang hinungdan sa pag-ulbo sa kalayo kaganinang alas-2:45 sa kaadlawon nga milamoy sa ikaduha ug ikatulong andana sa Butuan City Colleges kon BCC ug gibana-banang napulo ka lain pang establisamiento sa may Montilla Boulevard ning siyudad sa ingon masuta usab ang kinatibuk-ang damyos niini.
Pipila ka mga fire trucks ang mitabang pagpalong sa kalayo kansa wala na makatabok pa sa ubang mga kasikbit nge stablisamiento tungod sa gimontar nga mga fire walls.
Hinuon duna’y pipila ka mga empleyado sa kasikbit nga mga business establishments sama kang Grace nga daling misulod sa ilang pwesto aron makuha ang mga importanteng gamit ilabina ang laptop diin nasulod ang ilang mga files alang sa legal nga gamit.
Pila ka higayon nga milurang ug mibalik pag-ulbo ang kalayo rason sa apas-apas nga pagresponde sa mga bombero ning siyudad ug kasikbit nga mga lalawigan.
