BUTUAN CITY- Napatay sa Israeli airstrike si Izz al-Din Al-Beik, lider sa armed wings sa Hamas sa amihanang Gaza, atol sa pag-atake sa usa ka apartment building sa Nasr neighborhood sa Gaza City kagahapon Martes.
Gikumpirma sa Hamas ang iyang kamatayon, samtang giingon sa Israel nga si Al-Beik nalambigit sa pagplano sa mga pag-atake ug pagrekrut og mga militante.
Labing menos tulo pa ka tawo ang namatay sa laing mga Israeli airstrike sa Jabalia refugee camp, sumala sa mga mediko. Sigon sa Israel, gipakusgan niini ang mga operasyon batok sa Hamas tungod sa alegasyon nga nag-rearm ug naglunsad og mga pag-atake ang grupo bisan pa sa ceasefire, apan gilimod kini sa Hamas.
Sa laing bahin, gilubong sa mga Palestinian sa Nuseirat refugee camp ang nahabiling mga lawas sa 41 ka biktima nga bag-ohay lamang narekober gikan sa mga nangaguba, samtang gibanabana sa Palestinian authorities nga kapin 8,000 pa ka mga lawas ang nagpabiling nalubong ilalom sa mga debris sa Gaza.
