BUTUAN CITY – Nagpahigayon og unang jetski flag ride ang civil society coalition nga Atin Ito sa dagat duol sa Pag-asa Island niadtong Domingo, isip kabahin sa ilang ika-upat nga civilian mission sa West Philippine Sea.
Gipangulohan kini ni Akbayan Rep. Dadah Kiram Ismula, ug sumala sa grupo, nagsimbolo kini sa soberanya sa Pilipinas sa maong lugar.
Nagsugod ang misyon alas 5:40 sa buntag diin usa ka gamay nga grupo sa mga boluntaryo misakay og rubber boat sa wala pa gihimo ang jetski ride. Malampuson nilang napataas ang bandila sa Pilipinas sa Pag-asa Cay 2 bisan pa sa giingong “bug-at nga presensya sa China” sa lugar.
Gikumpirma pa ni Rep. Dadah Kiram Ismula, luwas ang ilang biyahe apan nagdali sila tungod kay dunay nagsunod kanila nga Chinese vessel.
Samtang giakusahan sa China ang Pilipinas og ilegal nga pagsulod sa giila nilang giilogang katubigan. Mibutyag Ang China Coast Guard nga lima ka Pilipino ang nakita nga midunggo sa maong lugar.
Sa panig sa Pilipinas, gipahayag sa mga awtoridad nga nagpadala sila og coast guard personnel human makadawat og report nga adunay mga Chinese personnel nga unang nagbutang og bandila sa sandbar.
Ilang gibantayan usab ang presensya sa mga barko sa China nga ginadudahang nagbuhat og ilegal nga pagdukiduki sulod sa katubigan sa Pilipinas.
Sa laing pahayag, gibutyag sa Atin Ito nga usa ka barko sa People’s Liberation Army Navy—usa ka Jiangkai II-class frigate—ang miduol sa ilang grupo samtang nagpadayon ang aktibidad.
Sumala sa grupo, anaa sa 1,000 yards ang gilay-on sa barko gikan sa ML Chowee, ang sakyanan-dagat nga nagdeploy sa jetski gikan sa MV Kapitan Oca. Miduol usab kini hangtod mga duha ka nautical miles gikan sa Pag-asa Island.
Nagsugod niadtong Abril 30 ang civilian mission sa Atin Ito ug molungtad hangtod Mayo 5, nga naglakip og mga kalihokan sama sa paghatag og pagkaon ug gasolina, medical outreach, cultural events, ug island tours.
