BUTUAN CITY – Gisugyot sa United States Food and Drug Administration kon FDA ang pag-usab sa nutritional requirements sa infant formula kon gatas nga gipa-inom sa mga batang masuso, isip kabahin sa unang komprehensibong pagrepaso sa nutritional content niini sulod sa hapit 30 ka tuig.
Kabahin kini sa Operation Stork Speed initiative sa administrasyon ni US President Donald Trump nga gilusad niadtong Marso 2025.
Sa unang hugna sa pagrepaso, upat ka nutrients ang gisugyot nga usbon, lakip ang iodine, manganese, vitamin A ug vitamin D nga importante sa paglambo sa utok, bukog, panan-aw ug resistensya sa mga masuso.
Lakip sa mga kausaban ang pagpataas sa iodine ug vitamin D content, samtang ipa-ubos ang minimum nga manganese ug vitamin A requirements.
Gipamatud-an usab sa FDA ang mga kasamtangang nutritional requirements alang sa chloride, potassium, selenium ug sodium.
Sumala sa FDA, tumong niini nga masiguro ang hustong nutritional standards sa mga produktong infant formula.
Gisuportahan usab ni Dr. Steven Abrams, usa ka pediatrician ug propesor sa University of Texas Dell Medical School, ang pagrepaso ug miingon nga dugay na unta kining gipatuman.
