BUTUAN CITY- Duha ka panimalay ang gilamoy sa kalayo sa Purok 4, Lower Banza, Butuan City, pasado alas 9:30 sa gabii, kagapon Sabado, Agosto 22, 2026.
Gitahong nagsugod ang sunog sa balay sa pamilya Villarin, nga giokupar nila Wilson Apura Villarin, 62-anyos, ug Lorencita Villarin alyas “Nene,” 33-anyos, uban ang ilang tulo ka mga anak nga nag edad og 8, 4 ug 2-anyos.
Nadamay usab sa sunog ang silingang balay nga giokupar ni Claudia Montes Camarillo, 72-anyos, uban ang iyang myembro sa pamilya, lakip ang 2 ka mga bata nga nag-edad og 3-anyos ug 6-anyos.
Sa inisyal nga impormasyon, 2 ka balay ang naapektuhan sa maong insidente.
Samtang, sumala ni Kagawad Fritz Azote, Peace and Order Chairman sa Barangay Banza, andam ang barangay sa pagtabang sa mga apektadong pamilya pinaagi sa koordinasyon uban sa barangay ug lokal nga kagamhanan alang sa gikinahanglang assistance.
Wala pa usab maestablisar sa BFP-Butuan ang tukmang hinungdan sa sunog ug padayon pa ang gihimong imbestigasyon alang sa pagdeterminar kung unsa gayud ang gigikanan ug hinungdan sa maong insidente.
