BUTUAN CITY – Gawas sa paggamit sa Viagra nga hinagiban sa mga lalaking dili na mubarog ang ilang kinatawo, migawas karon sa usa ka pagtuon nga ang sildenafil, usa ka active ingredient sa Viagra, makapugong sa cancer metastasis, usa ka proseso kondiin ang mga tumors mukaylap sa ubang mga organs sa lawas.
Nasuta sa bag-o lang migawas nga mekanismo nga ang Sildenafil, mubabag sa enzyme nga gitawag og PDE5, kansa maoy mupataas sa levels sa usa ka signaling molecule nga gitawag og cGMP.
Kini ang susamang chain of events luyo sa epekto niini sa blood flow.
Nadiskubrehan sa grupo sa mga tigduki-duki sa Weizmann Institute sa Israel nga ang cGMP, musagol sa usa ka protein nga maoy responsable alang sa paglihok sa cholesterol sa sulod nga bahin sa cells.
Nasayrang ang mga cancer cells, nagsalig sa cholesterol aron mabuwag gikan sa usa ka primary tumor ug musakop sa bisan asa, ug ang pag-inom og Viagra, maoy hinungdan nga maglisod kini pagkaylap.
Ang pagpares sa sildenafil uban sa statins, nga maoy paspas nga mupa-reduce sa cholesterol production, makatabang usab. Kini nga ebidensya migawas base sa ilang pagtuon sa mga mouse models, cancer cells nga gi-culture gikan sa mga pasyenteng tawo ug sa 20 ka tuig na nga records nga naghabol sa 5 million ka mga membro sa Clalit health service sa Israel.
Sigon ni Dr. Samah Hayek, makadasig kini nga findings apan iyang giklaro nga wala kini nagpasabot nga magsugod na pag-inom og Viagra ang mga pasyente.
Ang survival data niini nag-cover lang sa mga tawong mi-inom na niini adiser sila na-diagnose nga duna’y kanser kondiin kadaghanan sa mga pasyente, mga lalaki. Gawas pa, gi-require pa usab ang random nga clinical trials alang niini.
