BUTUAN CITY- Gipasayon sa Department of Energy kon DOE ang proseso sa pag-instalar og solar power systems alang sa mga panimalay, gagmayng negosyo ug medical facilities pinaagi sa pagkunhod sa mga regulatory requirements ug pagpasimple sa aplikasyon.
Ubos sa Department Circular DC2026-08-0017, gilakip ang Self-Generating Facility Zero-Export Solar Systems kon SGF ZESS ug Micro-Solar Systems kon MSS nga hangtod usa ka kilowatt.
Alang sa MSS, dili na kinahanglan ang building permit ug Certificate of Compliance gikan sa Energy Regulatory Commission, apan kinahanglan lamang nga ipahibalo sa distribution utility.
Sa SGF ZESS, gitangtang usab ang building permit ug COC requirement, samtang gimandoan ang mga distribution utility nga wagtangon ang dili kinahanglan nga clearance, technical permits ug inspection charges.
Gitugotan usab ang paggamit sa kasamtangang analog meters sulod sa 12 ka bulan samtang gihulat ang scheduled meter upgrades.
Sumala ni Energy Secretary Sharon Garin, ang pagpasimple sa proseso ug pagtangtang sa dugang gasto maghatag og mas daghang higayon sa mga panimalay, klinika ug gagmayng negosyo nga makagamit og limpyo nga enerhiya ug makapakunhod sa ilang pagsalig sa kuryente gikan sa grid.
